|
| 10.71.1 | | śrī-śuka uvāca ity udīritam ākarṇya devaṛṣer uddhavo ’bravīt sabhyānāṁ matam ājñāya kṛṣṇasya ca mahā-matiḥ |
| 10.71.2 | | śrī-uddhava uvāca yad uktam ṛṣinā deva sācivyaṁ yakṣyatas tvayā kāryaṁ paitṛ-ṣvasreyasya rakṣā ca śaraṇaiṣiṇām |
| 10.71.3 | | yaṣṭavyam rājasūyena dik-cakra-jayinā vibho ato jarā-suta-jaya ubhayārtho mato mama |
| 10.71.4 | | asmākaṁ ca mahān artho hy etenaiva bhaviṣyati yaśaś ca tava govinda rājño baddhān vimuñcataḥ |
| 10.71.5 | | sa vai durviṣaho rājā nāgāyuta-samo bale balinām api cānyeṣāṁ bhīmaṁ sama-balaṁ vinā |
| 10.71.6 | | dvai-rathe sa tu jetavyo mā śatākṣauhiṇī-yutaḥ brāhmaṇyo ’bhyarthito viprair na pratyākhyāti karhicit |
| 10.71.7 | | brahma-veṣa-dharo gatvā taṁ bhikṣeta vṛkodaraḥ haniṣyati na sandeho dvai-rathe tava sannidhau |
| 10.71.8 | | nimittaṁ param īśasya viśva-sarga-nirodhayoḥ hiraṇyagarbhaḥ śarvaś ca kālasyārūpiṇas tava |
| 10.71.9 | | gāyanti te viśada-karma gṛheṣu devyo rājñāṁ sva-śatru-vadham ātma-vimokṣaṇaṁ ca gopyaś ca kuñjara-pater janakātmajāyāḥ pitroś ca labdha-śaraṇā munayo vayaṁ ca |
| 10.71.10 | | jarāsandha-vadhaḥ kṛṣṇa bhūry-arthāyopakalpate prāyaḥ pāka-vipākena tava cābhimataḥ kratuḥ |
| 10.71.11 | | śrī-śuka uvāca ity uddhava-vaco rājan sarvato-bhadram acyutam devarṣir yadu-vṛddhāś ca kṛṣṇaś ca pratyapūjayan |
| 10.71.12 | | athādiśat prayāṇāya bhagavān devakī-sutaḥ bhṛtyān dāruka-jaitrādīn anujñāpya gurūn vibhuḥ |
| 10.71.13 | | nirgamayyāvarodhān svān sa-sutān sa-paricchadān saṅkarṣaṇam anujñāpya yadu-rājaṁ ca śatru-han sūtopanītaṁ sva-ratham āruhad garuḍa-dhvajam |
| 10.71.14 | | tato ratha-dvipa-bhaṭa-sādi-nāyakaiḥ karālayā parivṛta ātma-senayā mṛdaṅga-bhery-ānaka-śaṅkha-gomukhaiḥ praghoṣa-ghoṣita-kakubho nirakramat |
| 10.71.15 | | nṛ-vāji-kāñcana-śibikābhir acyutaṁ sahātmajāḥ patim anu su-vratā yayuḥ varāmbarābharaṇa-vilepana-srajaḥ su-saṁvṛtā nṛbhir asi-carma-pāṇibhiḥ |
| 10.71.16 | | naroṣṭra-go-mahiṣa-kharāśvatary-anaḥ kareṇubhiḥ parijana-vāra-yoṣitaḥ sv-alaṅkṛtāḥ kaṭa-kuṭi-kambalāmbarādy- upaskarā yayur adhiyujya sarvataḥ |
| 10.71.17 | | balaṁ bṛhad-dhvaja-paṭa-chatra-cāmarair varāyudhābharaṇa-kirīṭa-varmabhiḥ divāṁśubhis tumula-ravaṁ babhau raver yathārṇavaḥ kṣubhita-timiṅgilormibhiḥ |
| 10.71.18 | | atho munir yadu-patinā sabhājitaḥ praṇamya taṁ hṛdi vidadhad vihāyasā niśamya tad-vyavasitam āhṛtārhaṇo mukunda-sandaraśana-nirvṛtendriyaḥ |
| 10.71.19 | | rāja-dūtam uvācedaṁ bhagavān prīṇayan girā mā bhaiṣṭa dūta bhadraṁ vo ghātayiṣyāmi māgadham |
| 10.71.20 | | ity uktaḥ prasthito dūto yathā-vad avadan nṛpān te ’pi sandarśanaṁ śaureḥ pratyaikṣan yan mumukṣavaḥ |
| 10.71.21 | | ānarta-sauvīra-marūṁs tīrtvā vinaśanaṁ hariḥ girīn nadīr atīyāya pura-grāma-vrajākarān |
| 10.71.22 | | tato dṛṣadvatīṁ tīrtvā mukundo ’tha sarasvatīm pañcālān atha matsyāṁś ca śakra-prastham athāgamat |
| 10.71.23 | | tam upāgatam ākarṇya prīto durdarśanaṁ nṛnām ajāta-śatrur niragāt sopadhyāyaḥ suhṛd-vṛtaḥ |
| 10.71.24 | | gīta-vāditra-ghoṣeṇa brahma-ghoṣeṇa bhūyasā abhyayāt sa hṛṣīkeśaṁ prāṇāḥ prāṇam ivādṛtaḥ |
| 10.71.25 | | dṛṣṭvā viklinna-hṛdayaḥ kṛṣṇaṁ snehena pāṇḍavaḥ cirād dṛṣṭaṁ priyatamaṁ sasvaje ’tha punaḥ punaḥ |
| 10.71.26 | | dorbhyāṁ pariṣvajya ramāmalālayaṁ mukunda-gātraṁ nṛ-patir hatāśubhaḥ lebhe parāṁ nirvṛtim aśru-locano hṛṣyat-tanur vismṛta-loka-vibhramaḥ |
| 10.71.27 | | taṁ mātuleyaṁ parirabhya nirvṛto bhīmaḥ smayan prema-jalākulendriyaḥ yamau kirīṭī ca suhṛttamaṁ mudā pravṛddha-bāṣpāḥ parirebhire ’cyutam |
| 10.71.28 | | arjunena pariṣvakto yamābhyām abhivāditaḥ brāhmaṇebhyo namaskṛtya vṛddhebhyaś ca yathārhataḥ mānino mānayām āsa kuru-sṛñjaya-kaikayān |
| 10.71.29 | | sūta-māgadha-gandharvā vandinaś copamantriṇaḥ mṛdaṅga-śaṅkha-paṭaha vīṇā-paṇava-gomukhaiḥ brāhmaṇāś cāravindākṣaṁ tuṣṭuvur nanṛtur jaguḥ |
| 10.71.30 | | evaṁ suhṛdbhiḥ paryastaḥ puṇya-śloka-śikhāmaṇiḥ saṁstūyamāno bhagavān viveśālaṅkṛtaṁ puram |
| 10.71.31-32 | | saṁsikta-vartma kariṇāṁ mada-gandha-toyaiś citra-dhvajaiḥ kanaka-toraṇa-pūrṇa-kumbhaiḥ mṛṣṭātmabhir nava-dukūla-vibhūṣaṇa-srag- gandhair nṛbhir yuvatibhiś ca virājamānam uddīpta-dīpa-balibhiḥ prati-sadma jāla niryāta-dhūpa-ruciraṁ vilasat-patākam mūrdhanya-hema-kalaśai rajatoru-śṛṅgair juṣṭaṁ dadarśa bhavanaiḥ kuru-rāja-dhāma |
| 10.71.33 | | prāptaṁ niśamya nara-locana-pāna-pātram autsukya-viślathita-keśa-dukūla-bandhāḥ sadyo visṛjya gṛha-karma patīṁś ca talpe draṣṭuṁ yayur yuvatayaḥ sma narendra-mārge |
| 10.71.34 | | tasmin su-saṅkula ibhāśva-ratha-dvipadbhiḥ kṛṣṇam sa-bhāryam upalabhya gṛhādhirūḍhāḥ nāryo vikīrya kusumair manasopaguhya su-svāgataṁ vidadhur utsmaya-vīkṣitena |
| 10.71.35 | | ūcuḥ striyaḥ pathi nirīkṣya mukunda-patnīs tārā yathoḍupa-sahāḥ kim akāry amūbhiḥ yac cakṣuṣāṁ puruṣa-maulir udāra-hāsa līlāvaloka-kalayotsavam ātanoti |
| 10.71.36 | | tatra tatropasaṅgamya paurā maṅgala-pāṇayaḥ cakruḥ saparyāṁ kṛṣṇāya śreṇī-mukhyā hatainasaḥ |
| 10.71.37 | | antaḥ-pura-janaiḥ prītyā mukundaḥ phulla-locanaiḥ sa-sambhramair abhyupetaḥ prāviśad rāja-mandiram |
| 10.71.38 | | pṛthā vilokya bhrātreyaṁ kṛṣṇaṁ tri-bhuvaneśvaram prītātmotthāya paryaṅkāt sa-snuṣā pariṣasvaje |
| 10.71.39 | | govindaṁ gṛham ānīya deva-deveśam ādṛtaḥ pūjāyāṁ nāvidat kṛtyaṁ pramodopahato nṛpaḥ |
| 10.71.40 | | pitṛ-svasur guru-strīṇāṁ kṛṣṇaś cakre ’bhivādanam svayaṁ ca kṛṣṇayā rājan bhaginyā cābhivanditaḥ |
| 10.71.41-42 | | śvaśṛvā sañcoditā kṛṣṇā kṛṣṇa-patnīś ca sarvaśaḥ ānarca rukmiṇīṁ satyāṁ bhadrāṁ jāmbavatīṁ tathā kālindīṁ mitravindāṁ ca śaibyāṁ nāgnajitīṁ satīm anyāś cābhyāgatā yās tu vāsaḥ-sraṅ-maṇḍanādibhiḥ |
| 10.71.43 | | sukhaṁ nivāsayām āsa dharma-rājo janārdanam sa-sainyaṁ sānugāmatyaṁ sa-bhāryaṁ ca navaṁ navam |
| 10.71.44-45 | | tarpayitvā khāṇḍavena vahniṁ phālguna-saṁyutaḥ mocayitvā mayaṁ yena rājñe divyā sabhā kṛtā uvāsa katicin māsān rājñaḥ priya-cikīrṣayā viharan ratham āruhya phālgunena bhaṭair vṛtaḥ |
|
English
Español
Pусский
Português
